Lo secretari general de l'ÒNU condemna energicament la decision del govèrn afgan dels talibans d’enebir a las femnas afganas de trabalhar amb las Nacions Unidas en aquel país. Delà de contravenir als principis basics de l’ÒNU e als dreches de las femnas, lo personal femenin es essencial car, “segon la societat e la cultura afgana cal de femnas per ajudar las femnas”, çò remembra l’organizacion internacionala.
 
Las autoritats d'Afganistan emetèron dimars un òrdre qu’empacha las femnas afganas que fan partida del personal de l’ÒNU de contunhar d’i trabalhar.
 
Après qu’Afganistan foguèt tombada entre las mans dels talibans en agost de 2021, l’ÒNU mantenguèt son engatjament d’i demorar per contunhar de prepausar d’ajuda umanitària del temps que cridava ajuda a la comunautat internacionala per la populacion del país.
 
 
Un regim misogin
 
Lo regim autoritari dels talibans es un dels mai misogins de la planeta. Dempuèi lor retorn al poder las femnas son fòrabandidas dels emplecs publics, veson limitat lor drech de se desplaçar e enebit l’accès de las dròllas al collègi e al licèu. Lo pòrt del vel integral en public es obligatòri e devon demorar a l’ostal franc de situacions d’urgéncia.
 
Segon l’UNÈSCO, 2 milions e mièg de dròllas e  joventas an agut de quitar los estudis en Afganistan. Ara, a partir de 12 ans, las femnas an pas pus drech d’estudiar.
 
L’enebicion es tanplan arribada a las universitats. Dins un primièr moment, los talibans las daissèron estudiar dins de salas d’estudi separadas dels òmes, mas dempuèi decembre passat aquò lor es d’afons interdich. De soslinhar qu’entre 2001 e 2018 una gojata sus tres èra inscricha a l’universitat. Totun, i a dins aquel país un 30% de femnas que son pas jamai anadas a l’escòla. Una donada qu’aumentarà.